لاہور(آئی این پی)پاکستان مسلم لیگ (ن) کی مرکزی رہنما مریم نواز نے کہا ہے کہ حلقہ این اے 120کے عوام پاکستان کی ترقی کی راہ میں رکاوٹیں ڈالنے والوں کا احتساب کرنے کیلئے بے چین ہیں ،سیاسی مخالفین کی ’’میں نہ مانوں ‘‘کی رٹ ملک کیلئے سود مند نہیں ، انہیں چیلنج ہے 2013اور 2017ء کا موازنہ کر لیں فرق واضح ہو جائے گا، حلقے کے ووٹروں سے ہر سطح پر رابطہ رکھا جائے اور انہیں (ن) لیگ کے ایجنڈے سے آگاہ کریں ۔ان خیالات کا اظہار انہوں نے ماڈل ٹاؤن میں مرکزی رہنماؤں کے اجلاس اور جاتی امراء رائے
ونڈ میں حلقہ این اے 120سے تعلق رکھنے والے پارٹی کے متحرک کارکنوں سے ملاقات کے دوران گفتگو کرتے ہوئے کیا ۔ اس موقع پر سینیٹر پرویز رشید، سینیٹر آصف کرمانی،خواجہ احمد حسان، تہمینہ دولتانہ، میاں اسلم سلیم،حافظ نوید،نوید سواتی، انور شاہ سمیت دیگر بھی موجود تھے۔ اجلاس اور ملاقات کے دوران این اے 120میں انتخابی مہم ، آئندہ کی حکمت عملی بارے تبادلہ خیال کیا گیا ۔ مریم نواز کا کہنا تھاکہ مسلم لیگ (ن) اپنی کارکردگی کی بنیاد پر ضمنی انتخاب لڑ رہی ہے اور نیا پاکستان بنانے کے دعویدار بتائیں انہوں نے عوام کیلئے کیا خدمات سر انجام دی ہیں، عوام دھرنوں کے ذریعے ملک کی ترقی کی راہ میں رکاوٹیں ڈالنے والوں سے بخوبی آگاہ ہیں اور اپنے ووٹ کی طاقت سے ان سے ضرور حساب لیں گے۔ انہوں نے کہا کہ مسلم لیگ (ن) نے ہمیشہ ملک و قوم کے مفاد کی سیاست کی ہے اور انشا اللہ مستقبل میں بھی اس پر گامزن رہیں گے۔ اجلاس اور ملاقات کے دوران رہنماؤں اور کارکنوں کی طرف سے مختلف تجاویز بھی دی گئیں جن پر کھل کر تبادلہ خیال کیا گیا۔

اپنا تبصرہ بھیجیں