کراچی (مانیٹرنگ ڈیسک) نوابشاہ میں سابق صدر آصف علی زرداری نے ورکرز اجلاس سے خطاب کرتے ہوئے کہا نوازشریف کی حکومت کبھی نہیں آئی، ہمیشہ لائی گئی، سی پیک کا منصوبہ پیپلزپارٹی کے دور میں بنا، نواز شریف کریڈٹ نہ لیں، صرف دعوؤں سے حکومت نہیں کی جاتی۔ آصف زرداری نے اپنے خطاب میں کہا نواز شریف نے ماضی سے کچھ نہیں سیکھا، وہ اقتدار میں آکر سب بھول جاتے ہیں۔ انہوں نے کہا عوام کیجماعت صرف پیپلز پارٹی ہے، ہم نے اپنے دور میں روزگار کے دروازے کھول دیئے جس سے غربت میں کمی آئی۔ آصف زرداری نے دعویٰ کیا کہ 2018 میں حکومت پیپلز پارٹی کی ہوگی، عوام تیاری کریں۔قبل ازیں سابق صدر نے سینئر وزیر نثار کھوڑو، سندھ کے وزیر اطلاعات ناصرشاہ اور پیپلزپارٹی کے رہنماؤں سے ملاقاتوں کے دوران گفتگو میں کہا آئندہ الیکشن میں دھاندلی نہیں ہونے دیں گے، ہر حلقے میں ووٹ کی جنگ لڑیں گے۔ پیپلزپارٹی پارلیمینٹرین کے صدر آصف علی زرداری نے کہا ہے کہ آئندہ انتخابات میں اور اس سے پہلے مخالفین کو بڑے سرپرائز دیں گے۔ 2013 کے انتخابات میں پاکستان پیپلز پارٹی کے خلاف سازش ہوئی۔ جمہوریت کی بقاء اور استحکام کے لیے انتخابی نتائج کو تسلیم کیا۔ سینئروزیر نثار کھوڑو نے بتایا کہ ملاقات میں سیاسی صورت حال، میڈیا میں پارٹی اور حکومت کی کارکردگی اجاگر کرنے اور آئندہ انتخابات سے متعلق امور پر تبادلہ خیال کیا گیا۔ سابق صدر کا کہنا تھا کہ پیپلز پارٹی نے جمہوریت کیلئے قربانیاں دی ہیں۔ انتخابات قریب ہیں۔ پیپلزپارٹی سندھ کی پارٹی نہیں بلکہ پورے ملک کی نمائندگی کرتی ہے۔ نثار کھوڑو نے مزید کہا کہ ہم عوام کی طاقت سے آئندہ عام انتخابات میں پیپلز پارٹی کو ملک بھر میں کامیابی سے ہم کنار کریں گے۔ آصف علی زرداری سے سندھ کابینہ کے دیگر ارکان نے بھی ملاقات کی اور اپنے اپنے محکمے کی کارکردگی سے آگاہ کیا۔

اپنا تبصرہ بھیجیں